WÄR NID KUNNT DÄ ISCH KEI BASLER
Am Sunntig bruchts alli! Füllemr zämme dr Gäschteblock im Wankdorf.
Zug 1:
Basel ab: 13:25
Wankdorf aa: 14:39
Prattele: 20:33
Zrugg in Basel: 20:43
Zug 2:
Basel ab: 13:46
Wankdorf aa: 15:08
Prattele: 20:11
Zrugg in Basel: 20:20
Dr zweiti Zug wird zerscht zruggfahre.
Tickets (20.-/25.-) gits am Donnschtig und Fritig im Saal, sowie am Sunntig am Bahnhof vis-a-vis vom Coop. Dr Räscht wird vor em Gäschteblock verkauft.
Zugbillet lösisch am Automat so:
1. Weitere Angebote
2. Regionale Spezialangebote
3. Football-Ticket Fan-Extrazug
S Halbtax oder GA zeige mir in Form vo dr Kaufquittig. Die findsch unter swisspass.ch im Menüpunggt „Rechnungen“ – nid vergässe.
DATEDIEBSTAHL FEDPOL
Mitti Juli het fedpol kommuniziert, dass bimene Hackeraagriff uff d Firma Xplain e Uszug us em Informationssystem HOOGAN gstohle und aaschliessend veröffentlicht worde isch. Die betroffene Persone sötte vo fedpol au per Post informiert worde si.
Zum eine zeigt dä Vorfall, dass d Sicherheit vo de Date nit gwährleistet worde isch bzw. die an e extärni Firma witergäh worde sin. Zum andere handlets sich dodrbi um Date us em Joor 2015, also Informatione, wo scho lang hätte miesse glöscht wärde.
Für uns Grund gnueg, rächtligi Schritt iizleite. Wer betroffe isch – d.h. wer in de Joore 2012, 2013, 2014 oder 2015 mitere Massnahme vom Hooligan-Konkordat (Stadion-, Rayonverbot etc.) belegt gsi isch -, söll sich dorum mögligscht bald (spötischtens bis am 6. Oktober) bi recht@muttenzerkurve.ch mälde. Das unabhängig vonere allfällige Mitteilig vo fedpol.
130 JOOR: LOOSE
Dä Fritig, 06. Oktober, foht s Jubiläumsprogramm zum 130. Geburtsdaag vom FCB aa. Dr Mario Cantaluppi, dr Guschti Nussbaumer, d Andrea Häner-Roth, dr René Häfliger und dr Beni Thurnheer kömme in Saal 12 und vrzelle ihri eigene Gschichte, wo sie mit em FCB erlääbt hänn. E spannende Obe im Liecht vo einzigartige Anekdote vo Persone, wo dr FCB uff ihri ganz eigeni Art und Wiis prägt hänn. Kumm vrbi! Offe isch ab 18:30 – Start: 19:30.
Die witere Aaläss im Saal bis im Winter findsch uff saal12.ch.
