IILAUFMUSIK
Zur Abstimmig vom FCB über die neui Iilaufmusik (nur für Mitglieder):
Am liebschte hätte mir gar kei Iilaufmusik, sondern dass d Mensche im Stadion bim Iilaufe für Lärm sorge. Es söll dr FCB bliibe, wo uns in Stimmig bringt und nit e animatorischi Musik.
An ere Sitzig im Summer 2009 het me sich mit Verträter us allne Sektore uff folgende Kompromiss geinigt: D Goolmusik und s Baslerlied (wo als wie mee an Kraft verloore het) abzschaffe und als Iilaufmusik e Thema us dr 9. Sinfonie (allegro con fuoco) vom Antonín Dvořák z näh. Mit däm hän mir guet könne lääbe. Erschtens isch sie kurz und pregnant und zweitens sin mir die erschte mit dääre Melodie, was für d Identität und dr Charakter nit unbedütend isch.
Die «neue» Vorschläg sin diesbezüglig scho stark verbrucht: Hells Bells = St.Pauli, Jump = Marseille, Heart of Courage = EM 2012.
Mir wünsche uns drum, dass me an däm wohl bedachte Entscheid feschthaltet und empfähle, für die bestehendi Melodie z stimme.
