FRITTIG & SAMSCHTIG
Frittig | 14. Oktober
- Dr Saal bliibt zue
Samschtig | 15. Oktober
- Grill ab 17:00 uff dr Plattform
- S neue MK-Longsleeve kunnt in Verkauf; CHF 40.00
- Noch em Match no e Viertelstund für s Inestuehle reserviere
STANDPUNGGT PSG
Nochdäm dr FCB die vo de französische Behörde feschtglegte Modalitäte zum Ticket-Bezug bekannt gää het, stoht für uns fescht, dass mir em Spiel wärde färnbliebe. Spannend wärs aber gsi, nid nur d Modalitäte, sondern au e Begründig z bekoo.
Die Registrierig via personalisierti Voucher wärde mir – analog zu ähnlige Vorhabe in dr Vergangeheit (Fanpass 2002 und noch em 13. Mai 2006, div. Spiel geege d AS Roma) – nid mitmache.
Kunnt drzue, dass die ganzi Aagläägeheit au abgseh vo dr Personalisierig e Farce isch für sämtligi Fans, wo ihre Verein usswärts unterstütze: Vom miehsame Bezug (Voucher in Basel, Ticket/Bändeli vor Ort) über dr Zitpunggt vo dr Information (12 Dääg vor em Spiel, obwohl d Begäägnig sit Ändi Auguscht feschtstoht und zig Fans ihri Reise scho buecht hän) bis zum rätselhafte Kontingänt vo 800 Karte (lt. Vorgabe stoht em Gaschtklub 5% vom gsamte Fassigsvermöge zur Verfiegig; also knapp 2’000 Plätz in däm Fall) widerspricht alles an däm Prozedere unserne Vorstellige vomene Matchbsuech.
Die Massnahme hän zum Ziel, die wildi Komponänte vo dr Fankultur europawiit kaputt z mache – grad Paris isch erfahre drin, bekämpfe Verein und Behörde die aigeni Fanszene doch scho sit Joore. Dass PSG sit dr Übernahm vo katarische Investore (QSI) vor allem als Marketing-Instrumänt vom Emirat Katar dient und dr Klub viel vo sinere ursprünglige Magie verlore het, isch denn au bezaichnend. Mr lähne das schikanöse Prozedere dorum entschiede ab.
Wär sich zur organisierte Fanszene bekennt (oder wäm das Bezugsystem schlicht z miehsam isch), söll sich däm Uffruef aaschliesse und em Gäschteblock färnbliibe.
Wo mr gmeinsam dr Match luege, wärde mr no informiere.
PARIS
Us aktuellem Aalass: Nochdäm d Informatione zum Ticket-Bezug bekannt sin, stoht für uns fescht, dass mr em Spiel wärde färnbliibe. Je weniger Fans so Massnahme mittrage, desto stärker isch s Zaiche.
Mee drzue morn.
*********
Ans Spiel in Paris wirds kei organisierti Fahrt gää.
Zuesatz: Do die bishärige Informatione bezüglig Ticket-Prozedere nid sehr vielversprächend klinge, isch momentan no unklar, wie mir in Paris uffträtte wärde.