UPDATE CUPFINAL
Geschter isch vom Schwizerische Fuessballverband SFV und de Bärner Behörde dr Kompromissvorschlag koo, dass s Matchticket nid nur füre Extrazug, sondern für dr gsamti ÖV in dr Schwiz zellt, egal vo wo me aareist.
D Koppelig vom Stadioniitritt an d Extrazug-Fahrt entfallt dodrmit und au d Forderig noch ere Ermässigung wird zumindescht im Fall vom disjöörige Final zumene gwüsse Grad erfüllt. Für uns isch das zwar nid die perfäggti Lösig, kunnts doch au so immer no zu unfaire Konstellatione (zB für Cupfinal-Bsuecher us Bärn, wo d Aareis fascht komplett wägfallt). Bedänggt me aber zuesätzlig die feschtgfahreni Situation zwei Wuche vor em Spiel, isch es für uns e gangbare Wäg, denn au für d Zuekunft hän mir einiges könne bewege. Dass d Priise für das Joor grad au hisichtlig Ermässigunge nüm könne aapasst wärde, könne mir verstoh, het doch dr FC Thun scho aagfange, Tickets z verkaufe. Dr SFV het uns geegenüber aber kommuniziert, dass är bereit isch, die künftigi Priispolitik z überdängge.
Mir stoppe dorum dr Verkauf vo unserne aigene Billette und dr Uffruef zum Boykott vo de Extrazüg.
Au in Zuekunft wärde mir d Priisentwicklig – nid nur im Cup – beobachte und uns für bezahlbari Iitrittspriise iisetze.
Infos zum Umtusch beziehigswiis zum Bezug vo de offizielle Matchtickets folge an däre Stell und so schnäll wie möglig.
Alli uff Bärn! Dr Cup ghört uns!
VERZELL EMOL…
Dr Ruedi Zbinden wird morn leider nid in Saal könne koh, drfür diversi Spieler uss dr 1. Mannschaft. Stimme mr uns zämme uff die näggschte Spiel ii.
Usserdäm: Tickets für dr Cupfinal und Pizza us em Holzoofe.
Offe ab de 6i
DR CUP GHÖRT UNS
Wär drbi gsi isch, wird sich no lang dra erinnere: Final in Gänf – Basel geege Sion. Noch drei empfindlige Finalniederlage in de voraagangene Joor gwinne mir 3:0 und zerstöre dr Walliser Cupfinal-Mythos.
Die drufffolgende zwei Joor sin für uns erfolgsverwöhnte FCB-Fans eher durzoge gsi, doch jetzt hän mir wieder d Chance, e Pokal in d Höchi z stämme. Dorum:
Am 19. Mai alli uff Bärn!
Tickets und Aareis
Dr Cup ghört uns aber au allne andere. Scho im Vorfäld hän mir inere Stellignahm d Priispolitik kritisiert und unseri Ablähnig geegenüber Kombitickets zum Ussdrugg brocht. Zu däm Zitpunggt isch uns geegenüber nid kommuniziert worde, dass es uff dr Geegetribüni e Ermässigung für Famillie wird gäh. Mögligerwiis het sich dr Schwizerischi Fuessballverband also au dangg em Drugg vo uns Fans zu däm duuregrunge. Das längt jedoch bi witem nid und dorum wänn mir jetzt e Zeiche setze:
Mir wärde kaini offizielle Matchtickets kaufe, sondern unseri aigene Billette verkaufe. Zudäm riefe mir alli FCB-Fans zunere individuelle Aareis und somit eme Boykott vo de Extrazüg uff.
Noch eme gmeinsame Marsch vom Träffpunggt in dr Stadt zum Stadion wärde mr am Iigang de Verantwortlige vom Fuessballverband s Gäld uss em Billetteverkauf übergäh. Mir gän uns zueversichtlig, dass denn vor Ort oder villicht au scho im Vorfäld e Lösig gfunde wird. Umso mee, wenn mir FCB-Fans wie au scho in Vergangeheit alli an eim Strick ziehn und e Einheit bilde, wo denn au im Stadion zur Unterstützig vo dr Mannschaft nötig isch.
D Billette zum Priis vo 40.-/25.-, aaglähnt an Vorschlag vo dr Kampagne «Fuessball für alli» im Joor 2014, sin ab sofort wie folgt erhältlig:
• Saal12: Donnschtig/Fritig und zuesätzlig am kommende Mäntig
• Haimspiel: Am Bauwaage und rund um s Stadion
• Usswärtsspiel: Im Extrazug und im Block
Uns isch bewusst, dass mir uns mit däre Aktion us em Fänschter lähne und dass es nid eifach nur schwarz und wiss git. Dr Schwizerischi Fuessballverband steggt uffgrund vo de Ufflage vo de Bärner Behörde in dr Zwickmühli und mir sin au mitverantwortlig für d Sicherheitsköschte. Mit dr Finalteilnahm vo Thun wärde die jedoch ainiges tiefer ussfalle als au scho.
D Thematik isch kompläx und betrifft nid nur dr Final, sondern au dr gsamti Cupwettbewärb. Mit unserer Aktion wärde mir vielne Lüt vor e Kopf stosse. Ab und zue bruchts aber genau das, drmit öppis in Bewegig kunnt.
Witerverzelle und d Lüt überzüge! Setze mr alli zämme e starggs Zeiche!
Sott sich d Ussgangslag ändere, kommuniziere mir uff de üblige Kanäl. Witeri Infos wie Zit und Ort vom Träffpunggt in dr Stadt folge ebefalls dört zu gegäbener Zit.
