PLATTFORMBAR
Am Samschtig öffne mir ab 17:00 d Plattform Bar.
Mir zeige die beide Partie Wales v Dänemark (18:00Uhr)
Italie v Österrich (21:00Uhr)
Zudäm wird dr Kurvegrill iigheitzt. Zuetate sälber mitbringe.
Witersage!
ME HET E SAISONKARTE
Vor rund zwei Mönet sin mir um s Stadion aagstande und hän als Protescht unseri Halbjooreskarte abgäh. Eins vo de letschte Zeiche, wo unseri domooligi Unzfriedeheit zum Ussdrugg brocht het. Für Vieli eigentlig e undänggbare Schritt, isch doch d Jooreskarte immer au e Bekenntnis zum FCB und dr persönligi Schlüssel zum Joggeli mit sine gränzelose Emotione.
Wie us em Nüt het sich denn aber vor über fünf Wuche s Blatt gwändet und die neui Fiehrig het könne übernäh. Sithär wäiht e früsche Wind durch d Brüglinger Ebeni, wo au in dr Stadt für Uffbruchstimmig sorgt. E Stimmig, wo mir alli am liebschte in unserem Joggeli würde zelebriere. Leider isch momentan aber nonig absehbar, wenns wieder sowiit wird si.
Bi aller Erlichterig, wo dr Wäggsel mit sich brocht het: Finanziell stoot dr FCB überhaupt nid guet do; s strukturelle Defizit isch witerhin viel z gross. Nochdäm mir die letschte Mönet uff allne Ebene geege die alti Clubfiehrig und für e Neustart kämpft hän, sin mir jetzt wiederum verpflichtet, dr neue Fiehrig e Chance z gäh und dr Neustart mitztrage, anstatt jede Fähler sofort usszschlachte.
20’000 Saisonkarte sin s Ziel und me könnt meine, Basel schafft das locker. Doch nid wenigi hän sich in de letschte Joore us de verschiedenschte Gründ abgwändet. Nur wenn mir unser ganzes Umfäld wieder aktiviere und au neui Lüt ins Stadion bringe, het dr FCB die Basis, wonem die nötigi Stabilität für die näggschte Joore git. So ka im Joggeli wieder die Einheit entstoh, wo d Mannschaft scho mängmol zum Sieg dräit het!
In däm Sinn: Kaufe mir uns alli e neui Saisonkarte!
PLATTFORMBAR
D Plattformbar isch das Wuchenänd gschlosse. Bi guetem Wätter öffne mir am Sa. 26. Juni ab 17:00 Uhr wieder und zeige d Achtelfinals.