Muttenzerkurve Basel

ALLI UFF ZÜRI

Nid nur uff dä Räng sondern ändligg au mol wieder us sportligger Sicht brucht dr FCB am Samschtigoobe im Letzigrund geege dr FCZ jedi Stimm!

Abfahrt z Basel: 17h44 (Gleis 6)
Aakunft in Züri Altstette: 19h00
Zrugg in Basel: 00h14

Tickets
Gits am Fritig ab de 19h im Saal12, am Samschtig vor Zugabfahrt z Basel am Bahnhof SBB geegenüber vom Coop (dä bim Centralbahnplatz) und vor em Gäschtesektor.
Im Extrazug wärde usnahmswiis keini Tickets vrkauft.

PreCheck
Holet d Bändeli für d Zertifikatskontrolle möglichst scho z Basel, drmit mr am Iigang nid zviil Zit vrliere.
Achtung: D Bändeli könne uffgrund vo Bestimmige vo dr Gsundheitsdirektion Kanton ZH erscht am Matchdaag sälber gholt wärde!

SwissPass / Zahligsbestätigung
Um d Registrierig vo allne Lüt uff em Extrazug z vrhindere, zeige mir wie immer d Zahligsbestätigung vom Halbtax / GA und lön witerhin unsere SwissPass nid scanne!

D Zahligsbestätigung (Kontoauszug) ka me noch em Iilogge unter www.swisspass.ch im Menüpunggt „Rechnungen“ aabelade.

ÄNDLIGG (WIEDER) UFF CAROUGE

Egal ob wie 1994 in dr Bomberjacke, wie 2021 in dr gwohnte Matchdaagkleidig oder eifach in Trainerhose: Hauptsach me trifft sich am Mittwuch uff em Extrazug!

Abfahrt z Basel: 14h10
Aakunft z Gänf Stadion: 18h01 (aaschliessend fahre mr mit Büs zum Stadion in Carouge)
Zrugg in Basel: 00h51

Uff em Ruggwäg haltet dr Extrazug in Prattele und Muttenz.

Tickets
Gits uff em Extrazug im letschte Waage und vor em Gäschtesektor.

PreCheck
Holet d Bändeli für d Zertifikatskontrolle möglichst scho z Basel, damit mr am Iigang nid zviil Zit vrliere, will d Aakunft knapp vor em Aapfiff isch.

QUIZ

Am Fritig 29. Oktober gohts in unserer Quizreihe nit nur um lokali Fuessballer odr Verein; s Quiz widmet sich ganz allgemein dr Wält vom Fuessball. Vo dr Bundesliga bis zu La Bombonera isch do für alli Kenner:inne öbbis drbi. Quizstart isch am 20:00.

Aamälde in maximal 4er Teams unter info@saal12.ch

Mee Infos zum Saalprogramm bis Ändi Joor findsch uf saal12.ch