LUZÄRN – DR GSCHIIDER GIT NOO, DR ESEL BLIBT STOO
Am Sunntig starte mir usswärts in Luzärn in d Rüggrundi. Die sportligi Usgangslag verspricht einiges an Spannig und losst uns witer hoffe. Aber egal was kunnt, mir verträtte Rotblau überall mit vollem Iisatz und lön uns vo nüd untergriege.
Sit Joore reise mir mit em Extrazug an d FCB-Spiel in Luzärn und laufe zämme vom Bahnhof zum Stadion. Bim letschte Mol hets e kurze Zwüschefall gää, bi däm für wenigi Sekunde e handvoll Stei uff e Polizeiauto gworfe worde sin. Dr räschtligi Daag isch ohni nennenswärti Vorkommnis über d Bühni wie in de allermeischte Fäll au sunscht bi dr Aareis.
Trotzdäm het jetzt d Luzärner Polizei mitteilt, dass am Sunntig kai Marsch duldet wird und e Bustransfer vorgschriebe isch. Aafänglig het me sogar dr Gaschtsektor welle schliesse. De Grücht noch und mit de Erfahrige in Bärn bim Spiel geege YB Mitti Dezämber mien mir au an däm Daag vonere Machtdemonstration vo dr Polizei usgoo, wo uns um jede Priis in die Büs wird welle zwinge.
Zum ere allfällige Eskalation am Bahnhof us em Wäg goh, verzichte mir uff e gmeinsami Aareis und träffe uns spötischtens 15.15 Uhr vor em Iigang zum Gaschtsektor. Tickets gits hüt Obe im Saal oder dört vor em Block. Für die, wo kai Mögligkeit zur individuelle Aareis hän, fahrt dr Extrazug wie folgt:
Basel SBB ab: 13.25
Luzärn aa: 14.47
Luzärn ab: 19.11
Basel SBB aa: 20.34
Für alli, wo e Schnälltest (nur no 24h gültig) mien mache: S Testcenter bim Joggeli (neu uff em Schotterplatz bi dr Iishalle) het am Sunntig vo 10.00-15.00 offe. Bändeli gits sowohl dört als au an de sunscht üblige Ort.
