ABWÄSENDI AAWÄSEND
Fascht e Joor isch es här, sit mir bim Haimspiel geege Apoel Nikosia s letscht mol zämme im Stadion gstande sin. Kurz drvor hän mee als Dausig FCB-Fans in dr Kasärne d Plattetaufi vo «Ganz Basel macht jetzt Krach» zelebriert. Surreal, wenn me sich die letschte Mönet vor Auge fiehrt. Mir mien sithär uff die meischte Momänt vom Zämmekoo und dr Begeegnig vo dr rotblaue Fangmeinschaft verzichte.
Usgrächnet in däm Zitruum het bim FCB mit em Theater rund um s Thema Lohnverzicht e längeri, verhältnismässig ruhigi Phase gändet. Sithär isch derart viel passiert, ohni dass es wirklig e Ventil für die sich zunähmend aagstauti Wuet gää het. D Mediebrichterstattig isch fascht dr einzig Ort vom Widerhall gsi und praktisch dr ganzi Protescht het in dr digitale Wält stattgfunde. Rund um uns isch es in dääre Zit ungwöhnlig ruhig bliibe – generell, aber au rund um d Ereignis bim FCB. Das isch zum eine dr momentane gsellschaftlige Situation gschuldet, zum andere sin mir vor allem im Hintergrund aktiv gsi; unter anderem mit unserer Mitwirkig bi «Yystoo für e FCB!».
Au im Vorfäld vo dr Jooreskarte-Verlängerig bis in Summer 2021 het me nüt vo uns ghört. Währenddäm bi andere Fuessballclubs in ere ähnlige Situation d Fankurvene grossi Solidaritätsuffrief mache, sin mir still bliibe. Nit, dass uns das Thema nit beschäftige würd – aber d Zwickmühli, wo mir uns dinn befinde, het kai Parole zuegloo. E Grossteil vo de Lüt het d Schnauze voll vo dr Clubfiehrig rund ume Bernhard Burgener und will ihre kai Gäld me aavertraue, was wiederum d Gfoor vomene Inveschtor erhöht. Glichzitig het d Jooreskarte e grosse symbolische Wärt, isch sie doch für vieli e Bekenntnis zum FCB, sit me sich die vor Joore s erscht Mol ins Porte-Monnaie gsteggt het.
Im Wüsse, dass mir mit dääne Gedangge nit ellai do stöhn, hän uns die kürzlig präsentierte Jooreskartezahle nur insofärn überrascht, als dass mr nit mit dääre Heftigkeit grächnet hätte. Währenddäm d Clubfiehrig mit Verwiis uff Corona trotzdäm vo guete Zahle redet, zeige die vor allem eins: Dr FCB het unter dr aktuelle Fiehrig kai Fundamänt me. Nur e verhältnismässig kleine Teil vo de Fans isch bereit, sich solidarisch z zeige und dr Club quasi ohni Gegeleischtig finanziell z unterstütze. Nit uszdängge, wie die Zahle ohni die erschti Option vo dr koschtelose Verlängerig würde usseh…
Doch egal was kunnt: Mir sin heiss uff d Rückkehr in d Stadie und wärde bis dört aane alles rund ume FCB kritisch beobachte und unseri Farbe au im Joor 2021 in irgendere Form begleite. D Plattformbar bekunnt e Terrasse, s neue Joggeli wird 20, d Christina Castioni isch sit 30 Joor bim FCB tätig und dr Tauli hoffentlig bald wieder uffem Platz. In däm Sinn: S git mee als was me seht oder was me weiss! So au d Aktion uff em obige Bild vor em Spiel geege dr FCZ, wo vo Sitte FCB unterbunde worde isch.
Comments are closed.