IN EUROPA KENNT UNS JEDE
Aagfange het alles im Juni 1999 mitere Fahrt nach Prevalije. Niemer vo de dört Aawäsende wird erahnt ha, wo uns die Reis überall ahnefiehre wird no wie lang sie wird go: Wär drbi gsi isch, erinneret sich gärn an die erschte Carfahrte in Oschte, an Ärmelkanal, an Extrazüg, Charterflüg und Gaischterspiel, an die stundelange Diskussione an de Iigäng vo Bukarest bis Madrid. An Spiel, wo mr z spoot koo sin, nie aakoo sin oder im Pub statt im Stadion gluegt hän.
Die zahlriiche Reise durch Europa hän unseri Kurve prägt und die gmeinsame Erläbnis hän zämmegschweisst. Sälte sin mr zähdausig Fans gsi, öfters nur e Handvoll und e bitsli mee.
Aber die, wo gfahre sin, hän die rotblaue Farbe überall mit Härzbluet repräsentiert.
Mit em bevorstehende Spiel in Eindhoven startet dr FCB die 20. Saison hinterenander europäisch. Die Jubiläumssaison söll nid wie im letschte Joor in dr Qualifikation ände. Dodrfür bruchts uns alli – usswärts wie dehai. Stöhn mir zämme für Rotblau ii und schreie unseri Mannschaft in d Gruppephase. Niemer kaa erahne, wo die Reis no aanefiehre wird.
Jubiläumsshirt
Aalässlig dr Jubiläumssaison verkaufe mir ab em erschte Heimspiel e Shirt am Bauwaage. Einersits als Hommage an die letschte 20 Joor dänggt, isch es andersits au e Uffruef an alli FCB-Fans, das Shirt quer durch Europa z traage.
Eindhoven
Uff Holland wärde mir e Busfahrt mit folgende Eggdate organisiere:
Abfahrt: Am Morge vom Matchdaag (23.7.) oder scho am Oobe vorhär
Zrugg: Im Verlauf vom Vormittag noch em Spiel
Köschte: ca. 100.- exkl. Matchticket
Aamälde: Per Mail an europa@muttenzerkurve.ch – wär zämme will fahre, söll sich grad als Gruppe aamälde.
Witersaage!
Mee Informatione zur Jubiläumskampagne folge an däre Stell.
